面試

「今日我地見 sister 喇！」囡囡說。

「噢，是嗎？」一早已知道的媽媽裝著不知道。

「我呢好乖咁坐呀，對腳拍埋，對手呢放響膝頭哥上面呀！」

「Sister冇問你問題咩？」媽媽問。

「佢有問我地，我有舉手，但佢冇請我出去。」

「咁你做得好好喎，舉手先，人地冇叫你，你又冇爭住答，好有禮貌！…… 咁你緊唔緊張呢？」媽媽問。

「人地我唔知啦，我就好緊張呀！」

「點解呀？」媽媽問。

「因為驚上唔到小學。」

「唔駛緊張，只要記得對人有禮貌，不要和其他小朋友爭執，做回平日的你已經得好好喇！…好多間學校都同你呢間一樣咁好架…」安慰囡囡，也說出內心的感受。

一直沒有說給囡囡知我們為她報考了什麼小學，也沒有對她說過面試會如何如何，目的是希望囡囡不要有壓力。

原來小孩子雖然少，但心卻清楚得不得了。這件事叫做媽媽的更明白，成年人真的要很小心說話和言行，以免加諸太多壓力給小朋友，因為他們自己也有對自己的要求，也有那份自發的壓力。